Psalms 33

Ukuu Na Wema Wa Mungu

1 ^aMwimbieni Bwana kwa furaha, enyi wenye haki;
kusifu kunawapasa wanyofu wa moyo.

2 ^bMsifuni Bwana kwa kinubi,
mwimbieni sifa kwa zeze la nyuzi kumi.

3 ^cMwimbieni wimbo mpya;
pigeni kwa ustadi, na mpaze sauti za shangwe.

4 ^dMaana neno la Bwana ni haki na kweli,
ni mwaminifu kwa yote atendayo.

5 ^e Bwana hupenda uadilifu na haki;
dunia imejaa upendo wake usiokoma.

6 ^fKwa neno la Bwana mbingu ziliumbwa,
jeshi lao la angani kwa pumzi ya kinywa chake.

7 ^gAmeyakusanya maji ya bahari
kama kwenye chungu;
vilindi vya bahari
ameviweka katika ghala.

8 ^hDunia yote na imwogope Bwana,
watu wote wa dunia wamche.

9 ⁱKwa maana Mungu alisema, na ikawa,
aliamuru na ikasimama imara.

10 ^j Bwana huzuia mipango ya mataifa,
hupinga makusudi ya mataifa.

11 ^kLakini mipango ya Bwana inasimama imara milele,
makusudi ya moyo wake kwa vizazi vyote.

12 ^lHeri taifa ambalo Bwana ni Mungu wao,
watu ambao aliwachagua kuwa urithi wake.

13 ^mKutoka mbinguni Bwana hutazama chini
na kuwaona wanadamu wote;

14 ⁿkutoka maskani mwake huwaangalia
wote wakaao duniani:

15 ^oyeye ambaye huumba mioyo yao wote,
ambaye huangalia kila kitu wanachokitenda.

16 ^pHakuna mfalme aokokaye kwa ukubwa wa jeshi lake;
hakuna shujaa aokokaye kwa wingi wa nguvu zake.

17 ^qFarasi ni tumaini la bure kwa wokovu,
licha ya nguvu zake nyingi, hawezi kuokoa.

18 ^rLakini macho ya Bwana yako kwa wale wamchao,
kwa wale tumaini lao liko katika upendo wake usio na kikomo,

19 ^sili awaokoe na mauti,
na kuwahifadhi wakati wa njaa.

20 ^tSisi tunamngojea Bwana kwa matumaini,
yeye ni msaada wetu na ngao yetu.

21 ^uMioyo yetu humshangilia,
kwa maana tunalitumainia jina lake takatifu.

22 ^vUpendo wako usio na mwisho ukae juu yetu, Ee Bwana,
tunapoliweka tumaini letu kwako.